كورونا في السودان ; من الآخر كده يا شباب

كوادرنا الطبية في السودان

كوادرنا الصحية،،، يديكم العافية

الرحمة تغشى كل ضحايا وباء كورونا في السودان و العالم.

التحية لكوادرنا الطبية في كُل أرجاء السودان

الموضوع ده ما هظار… ولا مُكايدات سياسية… ولا طلس بتاع حكومة ما قادرة تشتغل، الموضوع ده جد وخلونا من عباقرة اللايفات امثال ذوالنون واحمد الضي واخوهو ولؤي محترم – البين يوم وليلة اصبح بروفيسور في علم الوبائيات. يا اخوانا الحكاية دي جد! والكلام مش دخل الحوش،،، ده قاعد جوا المطبخ.

بالنسبة لركوب الراس في الطلعات والمرقات والونسات مع الشباب، انت اكعب من الشافع البلس هدوم العيد من قبل يوم الوقفة ويطلع بيها الشارع. بالجد كده يعني. انت ح تكون عرضة للمرض وفِّرَدك واصحابك ديل برضو هم عرضة منك وعرضة عليك. ياخي ما تصبر\ي شهر رمضان ده بس،،، الدنيا خلاااااص يعني؟ والمضحك انو بعدم المبالاة بتاعتنا دي فعلاً الدنيا خلاص.

ناس رزق اليوم باليوم… والله عارفين، السودان ده كلو شغال بي رزق اليوم باليوم،، لكن الحل موجود،، وفي حلتكم، شوف شباب لجان المقاومة، عندهم عمود ولا ناصية دكان ولا شجرة ولا مزيرة من زماااان الشباب بكونوا قاعدين فيها، امشي هناك واسأل، الموضوع ما فيهو عيب ولا إستحياء… العالم في حرب وجودية. اسأل واعرف وشوف، في شباب بوزعوا العيش والاكل وكل الحاجات بالبيوت،، دلفري يجيك لحدي عندك،، تاني داير شنو؟،، دكان حلتكم امشي جيب كل الضروريات حقتكم بالجاااابس كده وتعال راجع. جخنن في البيت، من متين رمضان ده نحنا بنحوم فيهو في السخانة دي؟ حليل زمن بندك الشغل والمدارس.

الحرم المكي فاااضي #كورونا

الحرم المكي فاااضي #كورونا

ناس الصلاة، وده الشهر الذي اُنزل فيه القرآن، كدي نجادلكم بالتي هيا أحسن،، أئمة المساجد في العالم الإسلامي ومجامع الفقه والتشريعات الإسلامية حول العالم شبه اجمعت على التدابير وضرورة رفع الصلاة وجعلها في رحالنا، يعني في بيتك من غير فلسفة وعربي كتير. نرجع في التاريخ الإسلامي ونشوف تعامل اهل الإسلام الاوائل مع الوباء. ودي حاجة ربنا يأجركم عليها ان شاء الله في الدنيا وفي الآخرة،، شفتوا العالم المُلحد رجع لمفهوم الرب والخالق لمن ضاقت عليهو بي سبب وباء #كورونا ، ودي فرصو لا تعوض في نشر الدين الاسلامي والدعوة.

للفقهاء وعُلماء الدين، وحتى الكانو ببزغوا زمان في المنابر ويتفتفوا،،، دعوة ليكم للإعتكاف في منازلكم ومراجعة الاحاديث والسيرة والبحث لنا عن خلفيات إسلامية تاريخية في التعامل مع الطاعون او الوباء بصورة عامة. بدل البتعملوا فيهو ده،، انتوا طارق جيبو بس ما قابلكم، كان وراكم يعني شنو #كورونا.

وفي الاخير يا شباب، الرسالة واضحة ومُختصرة جداً!

الكلام ده كان امبارح، ٢٩ ابريل ٢٠٢٠

الليلة ده الحاصل لينا

الليله ٦٧ حالة جديدة

إجمالي الحالات

نهر النيل

البحر الاحمر

شرق دارفور

الخرطوم

غرب كردفان

جنوب دارفور

شمال كردفان

الجزيرة

سنار

النيل الابيض

وسط دارفور

القضارف

النيل الابيض

غرب دارفور

الشمالية

أرقام التبليغ

من داخل السودان

٩٠٩٠

ومن الخرطوم أيضاً

٢٢١

 

وخليك قاعد في البيت

اترك رد

تواصل معنا

قم بمراسلتنا عبر الإستمارة

2 + 11 =