اوعك تخاف

كلمات الشاعر: محجوب شريف

ألحان وغناء: شمت محمد نور والمجموعة (عقد الجلاد)

إستماع

 

أوعك تخاف

لـ شمت محمد نور | ثورة

كلمات الأغنية

يا من تموت بالجوع وقدامك ضفاف
والأرضِ باطنها ظلَّ مطمورة سواك
عطشان وقد نزلت عليك أحزان مطيره مُزَن سماك
الدنيا أوسع من تضيق قوم أصحى فِك الريق هُتاف
إن الذين أحبوا روحهم ضيَّعوك وبيَّعوك أعز ما ملكت يداك
أوعَك تخاف

***

الخوف محطه ما سكَّة وصولك للطريق
إن الأيادي الحُرَّه ما بْتشعِل حريق
تبْ ما بْتقيف تستنَّى قدامها بْتشوف يَحْتِل غريق تلو الغريق
ما تنسى إنك كنت صاحب راي وبيت أهلاً حباب لو دقَّ  باب
عندك مخدَّه وعنقريب هبَّابي، لمَّه وقهقهات
تصحى وتنوم وتقوم معطَّر بالنشاط
تنعس يقع في لحظه من إيدك كتاب
وقلم كما برق السحاب يتهادى ما بين السطور
كان سرجو كرسي الخيزران عند المغيرب رادي بغ بِنْ المزاج
يدخل من النفَّاج عليك عثمان حسين

***

يا عُشرة الأيام تمام… أهو ده الكلام..
يا سلوى جك المويه … أعملي لينا شاي 
الأُسرة مُمتدّة وحداك جيران لُطاف بي جاي وجاي
جار المسيحي سكن إمام
إلفة ومودة وقرقراب والناس قُراب 
ناس من نيالة وآخرين من وين ووين 
هسع جهنم في الحقيقة مُعسكرات

***

من أين جاءك هؤلاء..؟
ما جونا من قيف السراب او جونا من خلف الحدود 
بل جونا من جوانا هُم حُترُب هُنالك باقي في حلق الكلام
تلك البذور الراقدة في قاع الجُراب ما إتنفست فلق الصباح
كم نحنا أحياناً شربنا الموية من كاس الجراح
نفس الأزقة الفيها سكتنا الكلاب
ولكم وكم غلب الغُنا السَمِح النُباح

***

من بين اصابعنا المخدّرة بالسُكات
من بين مسامات العيوب يا الله من جلد البنات
جلداً موثق في القلوب وسكتنا ساي

جوّانا ما إنفصل الجنوب…
هم سمموك وقسموك خلوك مشتت في الدروب
حدّادي مدّادي الوطن قد كان … حليل الأغنيات

***

يا ايها الاسفُ الشديد اكتب نشيد من تاني أجمل أمُنيات
لا للشهيد تِل والشيهد إلا إذا خطأَ وصدفة
تحت هدير التنميّة موت الله ساي حتماً أكيد
او جونا من خلف الحدود…
وطن الجدود نفيدك بالأرواح نزود

***

من بعد ذلك يا جميل أحلم بمالك من حقوق
كشك الجرايد في الصباح …
كيس الفواكة والملابس والكراكريس والحليب
نكهة خبيز والدنيا عيد إنسان عزيز وطن سعيد
والشعب حُر

***

وطن التعدُد والتنوّع والتقدم والسلام
حيثُ الفضا الواسع حمام
الموجة خلف الموجة والسكة الحديد
حُرية التعبير عبير تفتح شهيتك للكلام

***

النهر ما بستأذن الصخرة المرور
جهراً بمر نحو المصب
أمواجو تلهف من بعيد 
أكتب نشيد راسخ جديد
الشمس تشهد وبرضو أذكار الظلام
وطن التعدُد والتنوع والتقدم والسلام

اترك رد

تواصل معنا

قم بمراسلتنا عبر الإستمارة

10 + 4 =