ثورتنا يادوب إبتدت، نبنيهوا أحمل بلد!

+44 7776336 111 info@ya-shabab.com

ذوالنون سكران ومعاهو زواميك في الشقة

ذوالنون سكران ومعاهو زواميك في الشقة

ايوا… عنوان المقالة كيف كيف. ما علينا….

الأستاذ ذوالنون، عمل لايف يوم١٤\أكتوبر\٢٠١٩. مدتو ساعة وأربعين دقيقه. الموضوع ما جديد وما خطير يعني. من زمان الزول ده بتكلم كتير. بس الغريب كان عجيب! الزول ده ربط لسانو وقال

انتقدني من كلامي لكن ما تنتقدني بالكلام البوقولوا الناس

طبعاً هنا القصد حنك حملة التشويه والإتهامات ليهو انو هو الدعا لمليونية الكيزان بتاعة أكتوبر المهم، يلا التصنيف كالتالي:

أي إنتقاد لذوالنون ده تبع حملة موجهة ضدو وتحديدياً من تجمع المهنيين والأحزاب إلخ… إلخ. الموضوع ده بعدين عندنا فيهو وقفة برضو…

اها، الحنك ما عندو علاقة بكلام الناس. للأمانة، اللايف اهو موجود قدامنا.

ردي علي الكلام البقولو .. وبطلو التهرب ... ..وح تعرفو وقتها الفرق بين الثقة والافتراء

Posted by ‎عثمان ذوالنون‎ on Monday, 14 October 2019

صح كونك تقول ما ح تعمل لايف وتجي تطلع تاني، عادي جدا. كتير ناس بحردوا الحاجه وتاني بتلقاهم بعملوها.

ضرب مثل: الكشتينة. كتير سمعنا ناس ح بتخذوا قرار بالتخلي عن الكشتينة او الكورة او اي نشاط او… او … إلخ إلخ… ويرجعوا تاااني وامكن مرات في نفس ذات التو واللحظة، يلا خلي بالك معاي، انت ماخد بالك انو المثال ده ما مثال قياسي؟ المعنى، دي كشتينة او كورة – يعني في الآخر تريفه. ما ثورة ولا دم شهداء ولا قضية.

كونك تمتنع عن اللايفات ما بيعني إنك إتخليت عن قضيتك، نكون ظلمناك إذا قلنا عليك كده. لكن كمان انت خليك حقاني معانا، لطالما إرتبطت لايفاتك بالقضية الثورية، صح اللايف هو أداة من الأدوات. لكن بالنسبة ليك انت وفي فترة مهمة جداً في حياة الثورة، اللايفات كانت اداتك الوحيدة المتكل عليها في حملتك ومشاركتك في القضية – الثورة السودانية. وبالنسبة لي انا وكتير زي، عرفناك من اللايفات، بتكلم معاك جادي والله! 

وبإعتراف منك وفي كم لايف. كنت تستشهد إنك بسبب المسافة الجغرافية وظروفك الخاصة ما عندك غير اللايف وانك ما بتنوم وانك وانك وانك…  

وطبعاً بحُكم إني زول عكليتة شديد. ممكن امسك واتطوطح ليك في الحته دي لمن انا وانت وباقي القُراء يزهجوا. لكن ما علينا. التقيل والأهم قدام.

خُلاصة الحته دي يعني. انت الخلاك تتراجع عن قرارك الأسباب التالية :

  • الوجع
  • الطمام
  • الضحك 

معليش يعني بس دي أعراض انا اول حاجه ما طبيب ولكن تقريباً عندها علاقة بالمرة الحامل  

  • الوجع – كلنا عارفنو 
  • الطمام – اكيد برضو عارفنو 
  • الضحك – والله دي غلبتني. إمكن “هرومنات”

اما في حالتك دي. بلخصا ليك في حاجه واحده وهي عبارة عن مقطع من أُغنية سودانية مشهورة بتقول 

غلبني كتر عليا ما ساهل ما شوية 

 وظاهره في نبرتك الحادة في الكلام وبتكشف كتير مرات من وين جاك الوجع. ربنا يخفف عليك ان شاء الله 

أنا ذوالنون المجنون 

 طبعاً كلنا عارفين كونك قلت انا ذوالنون المجنون لأنك قررت إنك تتكلم في بلد قوانينها بتمنع النقاشات السياسية – الأمارات – ده ما كفاية عشان نحنا نقوم ننعتك بالمجنون. انت ممكن تقول على روحك اي حاجه وانت حر. بس انا بدعوك إنك فعلاً يوم تقيف قدام المراية وتردد جُملتك دي (انا ذوالنون المجنون) براك مع نفسك وفي لحطة هدوء عصبي. 

 اول حاجه عندها لحن موسيقي ونوع من البلاغة. تاني حاجه تدل على وصولك لمرحلة عدم المُبالاة او الـلامُبالاة. ودي مرحلة خطرة جداً عليك كشخصية ثورية. لي قدام ممكن تعمل ليك ترسُبات مع أقرب الأقربين ليك فكرياً.

وهي ما “رجالة” ولا “شطارة” ولا “فهلوه” كونك توري عواقب الحاجة عليك وإنو غيرك ما بقدر يعملا لكن انت ح تعملها. بالعكس – ده بوري عدم نضوج فكري منك وعدم ديبلوماسية وعدم قدرة على الإلتفاف والتعامل مع المصاعب. وبعكس خصلة في شخصيتك ممكن تكسبك صفة غير حميدة. ألا وهي المُكابرة او العناد في الغلط. معناتا انت زول بتشوف الغلط وبتعرف عواقبو وبتعملو.  

 يا اما انت عاوز تثبت حاجه لي روحك انت براك في فهمك. يا أما انت عاوز تظهر بمظهر الشُجاع (على حسب تصورك انت برضو) لكن معليش، اسمح لي. ده نوع من الغباء – جدجد! وبدون اي محاولة للإساءة.

الدقيقه ٢

تمن الرجوع

إذا كان تمن الكلام رجوعك لي بلدك؟؟ انت ما كنت ناوي ترجع ولا شنو؟؟ !!  ما علينا. ما حنك، المهم زي ما قلت ليك، دي ما شجاعة ده غباء ـ صح اليوم واحد والعمر واحد والحق واحد.  

والله ما زعلان

يا زول ما تكضب. انت قلت غلبك عديل وما قادر والسبب الوجع والطمام والضحك. وتنازلت عن قرارك وكسرتا كلمتك وعملت لايف. وتجي تقول لينا ما زعلان؟؟ 

إفتراء وتعالي  

فكرك إنك تقول الكلام اللين الناعم – تجمع المهنيين يُمثلني  وهشتكنا وبشتكنا يا ريس ح يجعل منك بطل قومي؟، ده بدل على إنك صراااحة كده عندك عُقدة من حاجه اسمها تجمع المهنيين  

الدقيقه ٤

 موهبة إنك تقرأ الساحة صح 

ياخي إذا انت ما قدرت تقرا الساحة صح في القيادة وخشيت قاطعتا مسرحية كانت شغاله والناس متابعنها وإعتذرت قلت ما كنت عارف. كيييييييف يكون عندك موهبة قراية الساحة السياسية صح؟ دي صعب يبلعوها يا معلم – الدوائر مشغولة حالياً وشوف ليك حنك غيرها. للأسف موهبتك دي خذلتك كتير قبل كده. انا بشوف إنك تبطل تقول عليها موهبة. انت ما موهوب في الحته دي بالذات    

بتقول كلام وبحصل

اها يعني وداعية وسرك باااتع ولا الفهم شنو؟؟؟ 

 
لفيت وحُمتا وطُفتا  

للأمانة. من عرفتا الزول ده في اللايفات كان بتكلم عن الهامش. وشايل هم الهامش. بس كان عندو تركيز على جهة معينة فعلاً تستحق كل التركيز عليها. لكن شايفك لفيت وحمتا وطفتا على كل الهامش وهامش الهامش. عليك الله حته مرة وحمار بشربوا من بير واحده دي انا ما فهمتها. ما فاهم وين المشكلة في الحته دي! إذا هي بير. الحمار برفع الموية براهو زي المرا؟ ولا الموية برفعا زول تالت والاتنين بشربوا منها؟ على فكرة ده ما إستخفاف بحالات العطش الحاصلة في بلد النيل شاقيهو النص. 

  الفكرة في ظاهرة عدم التركيز في الكلام عندك، وده ممكن يكون حاجة عادية لاي زول منعفل. وبغض النظر عن سبب الإنفعال سواء إيجابي او سلبي هو في الآخر إنفعال. لكن انت اسي فرقك شنو من خطابات بِشّة الإنفعالية الزماااان الكان بهضرب فيها ديك؟ 

تفتكر انت كزول قائد حِراك ثوري، صفاتك الإنفعالية دي مرغوبة؟ 

انت بتتكلم عن مستقبل بلد. إنت بتتكلم عن دم شهداء. الإنفعالية ما بتنجح مع الجيل الراكب راس. – على أساس إنك قاري الساحة صح، المفروض تكون انت عارف كده. أسلوب لعب دور الضحية في إطار نظرية المؤامرة المُدبرة ده حنك بيش، الجكس زاتو بقى ما بقسم معاهو، خليك من الثوار. 

في تركيز منك بقى واضح على النساء وانو الثورة لابد تكون ثورة نساء. انت بتبيع مويه في حارة السقايين على فكرة. ده قطر فاتك زماااان. كادرك النسوي البتأمن بيهو المُخاطبات فضحك. الكنداكات بتصوروا في أمريكا مع الشفااتة. الصورة لي قدام بتلقاها. ما زيك ابيت تورينا الكانو معاك في الغرفة يوم اللايف. داسيهم. اكيد ما عندهم علاقة بالثورة غير الغنية الهججو ليك فيها. الكنداكات ما بغتغتوهم في شقق دولة الأمارات. يا ثورجي! 

شايفك ردمتا عبد الحي يوسف. والله الزول ده مسكين ياخ. كُل من هب ودب بخبِّت فيهو. حتى أنت يا ذوالكوز.  

الدقيقة ١٢

أنا عايز ابدا اللايف

قاعد ليك دستة بتاعة دقايق وما بديت اللايف؟! إذا كان انا صباعي ورم من الكتابة ياخ! المهم، بسم الله بدينا….  واصلو ما ترجع ورا كتير. قريب قريب. انت إذا كان ماشي لي قدام دقشتا الدنيا دي كلها. كان رجعتا خلف ح تعمل شنو؟ 

وحياة دين الله البلد دي تبقى ليكم اضيق من خرم الإبرة. 

اقبض اقبض اقبض. وحدة من الحاجات المغلغلاك انو تم إثبات تهمة الكوزنة عليك. وانت وصلت مرحلة فقدتا فيها القدرة على الإنكار أو الدفاع. دي مرحلة أتعديتها وبقيت في مرحلة الإنتقام. وباين من أسلوب التمنر الظهرتا بيهو انو الحته دي جد جد ماكلاك. ربنا يهون عليك

– التسوي بي ايدك، يغلب أجاويدك.  

الثورة دي دين وايمان وقناعات  

منو السرق شنو وانت عاوز تصنع شنو؟؟ الحته دي إرتجالية وما كان في داعي ليها. ما تفتكر إنك انت صنعت حاجه يا ذوالنون. انت ركبت موجة الثورة وفي يوم كنت تحت مظلة تجمع المهنيين وكنت بتقشر بيهم وباعتراف منك قلت بعد خلافك معاهم انو كبوك وختوها ليك واضحة إنك كنت من كوادر الحشد وما عندك دور – او بالأحرى مُؤهلات – عشان إنك تكون في طور البناء. ودي كانت القشة التي قسمت ظهر الـ……..، نقطناها عشان ما تقول بنبزوك، حاكم بقيت بكّاي شديد إنت.  ومن ديك وانت شاني الحملة. وقلب يقول لي إنهم اقنعوك بالحاجه دي بالورقة والقلم.   

كضبوا على الشفع الصغار ديل 

يعني انت شايفهم شفع صغار.. الشفع ديل يمتلكو صبر وقوة تحمل وإصرار ومثابرة وهدوء عصبي وتركيز اكتر منك.  

بنحاورهم، بنفهمهم وبنقنعهم ولي مصلحتهم، ما مصلحتنا، ونحنا ما عندنا مصلحة في السودان غير انو دايرين ليهو الخير  

صدق إنك زكرتني مقولة: 

هيا لله هيا لله لا للسلطة ولا للجاه.

أنت شمعة تحترق لكي تُضئ لنا ما حولنا يا ظرطون

 
الدقيقة ١٣

قالوا لينا 

اهااا قمنا على أمور قالوا لينا ويا ذوالنون وراجل عمرو ٩٠ سنة وطالب عمرو ١٣ سنه وبرضو انت وكلامك وقالوا لينا…. وانت يا بابكر حنين بتحن عليهم.

دي كده زي تتزكروا زمن الصاجات. شكلك وحلان وما لاقي ليك صاجات.  

 
الدقيقة ١٤

الفيل ابو زلومة

الفيل إتلوم والله! بطلع أقوال وإشاعات قلت لي. وبيع وشرا وأضان. أضان قدر العيشة؟، دي عيشة البوشي الفي جامعة الخرطوم؟  

بالبصيرة الجوانا دي ما بالعيون المنفخة.

ربنا يشفيك. 

 
الدقيقة ١٥

تاااني نبدى اللايف ونقطتين. فتحتا موضوعك مع إسماعيل التاج. ما عرفناهو فهم حقارة ولا فهم شفتنه ولا ده إسلوب خطابي سياسي جديد انت بتطور فيهو. بالجد يعني. في التلفزيون وقال انو إلخ إلخ…. 

قال ولا ما قال، وانا ح انشر المقال

– شاعر يا معلم. 

اب ضفيرة

انا كوني زول عندي صلعة وجلحات، الحتة دي ما ح اتدخل فيها ولا ح افتي فيها. 

خُلاصة الموضوع… وبعد كتائب الظل والإشاعات…. انت فهمك انو الزول ده قال ما دعينا للموكب وتاني قال دعا ليهو ذوالنون عبر كتائب الظل بتاعتو،  وجا بعد داك طلع بيان انو مع الموكب بتاع اكتوبر.   

انت ح تفتكر انو بإسلوبك الطفولي الأستخدمتو بتاع

يا اما ذوالنون فجأة بقى وطني يا إما هو البقى كوز

ده صراحة أسلوب طفولي وانا ما ح اناقشك فيهو. ممكن اشتري ليك حلاوة مصاصة كان عاوز. 

 محاولة هزيلة لإكتساب نوع من الشرعية ووهم منك بكونك تملك الحُجة في النقطة دي. شرك شنو وقلابة شنو يا ود ابرك انت (طائر سوداني)

بالنسبة لي

لاقوني في القنوات

انت تاني مافي قناة ح تستضيفك. عارف لي؟ لانك بتشاكل المذيعين. وبتتخيل انك في واحد من لايفاتك ومنظرك صراحة وهمي وبيش وإنت بتقابض الكلام وداير توري المذيعة شغلها وتتململ في قعدتك وتتعولق وغايتو يعني حركات كده! 

انت مالك ما قادر تقعد في الكرسي زي الناس؟ لالالا… ما كشفة نهار انت ولا كشفة تلفزيونات وقنوات فضائية.

وبرضو ما وريتنا الأحزاب باعونا لمنو (قطر السعودية الأمارات)؟؟. ورينا وما تتغاتت زي ما ابيت تورينا الزواميك الكانو معاك ومهججين ليك الهتافات. 

 
الدقيقه ٢٠

بدون ما تزعلوا.. او تزعلوا، تفهمو صح غلط ما فارق معاي

داير تخلف كراعك وبتستأذن من الزواميك المعاك، والزواميك الابيت تورينا ليهن سمحن ليك انك تخلف كراعك.   

كسرة: معناتا إنت ما مُسيطر يا اصلي. صدقني، دي ما ظرافة ولا ذوق. لانو ده ما محلهم. بس معليش لسة البلد عليك جديدة.

ااها… اخلفا، ارفعا، اديها الهوا … ما فارقة معانا. فأنا ما شايف انو دي كانت نُقطة تستاهل كمية الزمن الاخدتو فيها والتبذير الحصل لموارد الإنترنت والإتصال العالمية من المصدر (انت كصاحب اللايف) ومن المستقبل نحنا الكنا فاضين وبنتفرج فيك. خسارة جد جد خسارة. 

بالنسبة لي مفاوضات جوبا يا فارتي انت. الناس قعدت وح تنتفق. فحقو تخجل من نفسك يعني – والله! انت ما موهوب

قلت لي نقلوها “إلى حيث انا الآن” – الأمارات –  انت سَّرَقوك يا “بلوه”. خليك قاعد منتظر انت بس مع زواميكك ديل الابيت تورينا ليهم. 

نحنا ما عاوزين نقعد في جوبا والبيرة حقت جوبا ما سمحة

وتقول لي ما سكران! البيرة السمحة محل ما قاعد مش. وهندي ليها ظاهره في راسك. ما ح اتهمك بالبجاحة والإستخفاف بالمواضيع، بحكم انك بتتكلم عن قضية ثورة وحق شهداء ومستقبل بلد. بس ما لطيفة منك يعني ولا مُضحكة، بالعكس بايخة 

 

الدقيقه ٢٣

لا وكيف إنما وكم

 هنا انت وصلت مرحلة اسمها بالانجليزي تبسي Tipsy وبالعربي ممكن تقول انتشيت. يلا بعد ده الخرمجة بدت.

هنا وهناك ووجداننا ووجدناكم

– عندكم ليمون عليك الله؟

تحمل قلم للتوقيع؟؟ هع هع هع هع – قوية والله.

سمحة بيرة البلد ديك. 

 

الدقيقة ٢٥

يلا عاين… 

ما تقعد تشتغل على الوتر بتاع العبودية في محاولة لإكتساب تضامن الناس معاك. نحنا في سودان جديد. وفي غيرك عاملين دراسات دكتوراة في المواضيع دي وفي كيفية معالجتها. فما تطنطن كتير في المواضيع دي. انت غير مؤهل انك تتكلم عن المواضيع دي. لأنك ما خبير تاريخي ولا خبير إجتماعي ولا خبير جغرافي يا منبع انت. ولا ولا ولا ولا. انت سكراااان لـــــط. انت مؤهلاتك التاريخية او الجغرافيه شنو طيب عشان تتكلم في المواضيع دي؟؟ 

عمر الدقير شايفو واجعك. هع هع ضربك ضرب شديد. 

الدقيقة ٢٩

إستمرارية المفاوضات في جوبا

والله يا عمك انت قلت ما ح تستمر ولحدي ما انا لقيت لي زمن فاضي وكتبت البتاع ده، المفاوضات شغاااااله في جوبا. الكلام ده يعني تلاته أربعة أيام تقريباً نشوف بعدين على حسب تاريخ النشر. ما ظنيت اجي أتطر اني اغير الحته دي. عشان كده بقولا ليك – كضااااااااااااااابة! 

بالنسبة لمليونية أكتوبر دي الذكرى السنوية الكم وخمسين يا “رافة”. يعني الموضوع ما حاجه تم اقتراحها والناس تتهاتف عشان تتبناها. وكان جينا للحق. في مواعيد زي دي واجواء زي دي. تجمع المهنيين هو الأولى في تنظيم الإحتفالية دي وتحديد ورسم مسارات المواكب ونقاط التجمع. ولااااا تقدر تنكر زمان زمن البرجوكي زاتا بترجى إعلان المواكب وتجي تحشي بيها لايفاتك. أيام كنا شباب. هع هع . 

الدقيقة ٣٠

ناس كتار قاعدين في توتي في راكوبة بكرة في راكوبة في المطار بعد بكرة جمب القصر وبعد بعد بكرة بخشوا القصر

يعني انت داير تخش القصر؟ سمح. 

خليت أكتوبر ليكم  

ممكن اعرف “ليكم” دي المقصود بيها منو. غايتو على حسب كلامك ومن الفهمتو ومن الغلاغل الحاصلة ليك انو ديل تجمع المهنيين والأحزاب.  

 

الدقيقه ٣٢

إكتشفت انك بتعاني من أزمة ثقة كبيرة جدا وسط الناس البتشاكرك افكارك.  بديت تطّمن فيهم بمقولات بشيرية إنقاذية كوزية – قلت لي قلت ليهم انو ديل خايفين منكم؟؟ هع هع هع زكرتني البشير وكلامو عن امريكا والله! يجازي محنك 

أحزاب السجم وتجمع السجم

انت فاكر بلغتك دي ح تتقدم خطوة واحدة من اللايفات؟ يعني ح تبقى بطل قومي؟ يا عزيزي السكران المخمور. كلامك ده كلام شوارعية (من غير إنتقاص لحق الشارع) كلامك ده ما كلام زول ح يكون عندو دور في مستقبل بلد بتاعة مؤسسات. كلامك ده واسلوبك ده يأهلك انك تكون شغال بعّام بتاع ساوند. اهو تحنك وتشاكل كان القونات كان أصحاب الحافلات. مع جُل وكامل إحترامنا للبعامين والتحية ليهم بصفتي بعّام سابق. 

 قلت لي الدولة الجاية انت؟ فتها لينا في السهلة عليك الله وورينا انت لي ما عاوز ناس كتار… اها يا شفت يا سيدا يا مكملا.  

اجتماعات في دارفور واجتماعات في تشاد تتبع للطرح القادم. جاي السودان وماشي الفاشر قلة أدب….؟؟ والله وريتنا انك قليل الادب جدجد. 

الفاشر مثال لي دارفور ودارفور مثال للهامش. وجبتها بي فووووق من دارفور لي امبدة لي كسلا. وريتنا لكن! 

 مدني عباس شايفو واجعك شديييييد! ربنا يهون عليك. الشفت ماشاء الله شغال في الجماعة جزر جد!! نضف وزارة التجارة بالكلوركس والديتول. اقعد انت اسكر واقعد في أمور المغارز بتاعتك دي. ما ح تلقى غير الما عندو موضوع زي كده يفكها فيك.  

القيادات المصنوعة عبر صلاح قوش

علي بالحرم. آخر مرة سمعت عن الموضوع ده. كانوا أولاد الضي احمد ومصعب بحكم علاقة خالهم بصلاح قوش. فهل انت بتتكلم عنهم؟؟ ولا قصدك انو صلاح قوش من مؤسسي تجمع المهنيين؟؟ 

 

الدقيقه ٣٥

انا جدي أبو لهب

هع هع هع هع. طيب يا حفيد أبو لهب. شكلها خلاص. بدت تربط معاك. ابولهب زاتو كان شافك أيام البعثة النبوية كان جابك دار الندوة وحنكك خلاك تمشي تخطب في الناس ويجيبوا ليك هُبل قدام المنصة وتخت يدك عليهو وتحلف انك قابلتو. هع هع هع   

نحنا نحنا ونحنا ونحنا ونحنا..

بقيت عقد الجلاد بس! نحنا أهل الفرحة جينا.  تمسك ريموت وتقفل بلف وايييك. نحنا نحنا نحنا. اها اها غير الإستمتاع الفُكاهي والكوميدي بي كلامك ده. استفدنا شنو؟؟ وجايب أبو السيد الله يرحو معاك مركبو في المكنة. كويس انك حافظا. ما عندك عوجة. 

الجوع ما بفرز. وادروب الآن ما عندو دِرِب.

 

الدقيقة ٣٨ 

خلاص جابت أخرك هع هع – ماسك نار صااااح! بتدعونا الآن (طبعاً انا اعتبرت نفسي مدعو برضك يعني وكده) بكل صدر رحب انو نجي نقيف معاك ونبطل البنسوي فيهو ده.  اول حاجه انت قبيل قلت انتوا ما كتار وما داير ناس كتار.  تاني شي، “وتبطلوا البتسوا فيهو ده” عارف زكرتني منو؟؟ طارق جيبو لمن كان بشاكل في أولاد الحاج يوسف. والله جد.

نجي نقيف معاك وأسمعنا مرة

انت يا زول شكلو خلاص كيسك فضى وقمت تحنس وتشحد في الدعم. خلاص؟؟ حُجتك انتهت؟ بديت تلاحظ انو الناس بقت كاشفاك وانك زول وهمي في المقام الأول. واما الباقي ده خليهو عشان ما تزعل وبكرة تجي تقول بكتبوا فينا. بس انت طلبت نرد ليك في كلامك يعني. ولا كيف…؟ 

 

الدقيقة ٣٩

نبنزونا مرة بي كلامنا.  

أقول ليك شي. ده الخلاني اضيع الزمن د كلو والله واكتب فيك. ما قصة إني عامل مهم أو انت ما بالأهمية دي. لكن بس كده يعني. على حسب…. انت فاهمني مش

 يسرقون المواكب كما سرقوا الثورة

صعب تتبلع والله – قلل سقف الوهمات شوية عشان تكون قابلة للتصديق.  

 

 الدقيقة ٤٢

ح نسقط ولاء لم تجيب حبيبها

كدي علييييك الله عيد الحته دي وعاين ليها كم مرة. بس براك كده. ما ح أرد ليك عشان ما انزل بي مستواي لي نقاشات زي دي. ولكن،  وبما إنك كوز. ح ارد ليك بكلام رب العاملين ‏ 

‏‏إِنَّ الَّذِينَ يَرْمُونَ الْمُحْصَنَاتِ الْغَافِلَاتِ الْمُؤْمِنَاتِ لُعِنُوا فِي الدُّنْيَا وَالْآخِرَةِ وَلَهُمْ عَذَابٌ عَظِيمٌ
‏‏وَالَّذِينَ يَرْمُونَ الْمُحْصَنَاتِ ثُمَّ لَمْ يَأْتُوا بِأَرْبَعَةِ شُهَدَاء فَاجْلِدُوهُمْ ثَمَانِينَ جَلْدَةً‏

 عندك ٨٠ جلدة يا اصلي. ولا جيب شهودك. وما تقول لي انا قلت حبيبها. وتنط بعدين – نحنا زااتنا عاوزين نعرف اخر الموضوع ده شنو.  

‏‏إِلَّا الَّذِينَ تَابُوا مِن بَعْدِ ذَلِكَ وَأَصْلَحُوا‏‏

كان كمان أعلنت توبتك وإعتذرت للوزيرة تكون زول ربيت روحك كويس.

مافي سياسي ولا في قائد حِراك ولا في بطل قومي بقول كلامك ده. كلامك ده ونسة ………… انت عارف انا قاصد شنو.

واجعاك جابوها من أمريكا دي وختوها وزيرة – هع هع هع هع ما تزعل… بعددين بجيب ليك مشاهد من امريكا ان شاء الله تعجبك

تسقط قحت!

انت يا زول شايت على وين؟؟ بالجد كده؟  

 

الدقيقة ٤٤

تسقط بس” كانوا بقولوها اتنين وتلاته في الفيس

منو ديل عليك الله؟ انت واحمد ومصعب الضي؟؟

جايين تدوروها من كل الزقاقات.

منو ديل؟ الناس الشوية القلت ما عاوزهم كتار؟؟ انت يا عمك انت ماخد كاس الشجاعة. وبدى يشتغل. يا زول نموت كلنا شنو. موت براك يا عمك. زمن الموت إنتهى. وقف إطلاق النار اصبح واقع ملموس. انت عاوز ترجع بينا لي ورا ونحنا ورانا بلد عاوزين نبنيهوا. ما فاضين لي ترسباتك وعقدك دي. 

الوجع الفينا بحرقكم، اعملوا حسابكم
تتولع في ناس دمنا كان رخيص بالنسبة ليهم 
اعملوا حسابكم شديد
لأنو الطرح القادم قادم، احسن يجي بالتي هيا أحسن

 اسي ده يعني تهديد؟؟ نعتبر ده تهديد منك؟؟ ولا انت بس خانك التعبير؟ او كيسك فضى؟؟

والله ماف كلام لكن. انجليزيك من ما مشيت الإمارات إتصلح. لكن مااااا بتلحق انجليزي الأصم 

 احسن نجي بالسلم.
قادرين نفجركم، نحرقكم نعمل أي شي في البلد، ما دايرين
لحدي الليله بنترجاكم. امشوا صح   

اها دا الليله، عرفناها شغال فينا تراجي مصطفى وإيهاب توفيق وتترجى فينا (أو فيهم)

بنترجاكم ما تقلوا أدبكم ياخي!

هع هع هع هع ديل مالم…. ديل حرقم، حرقم ويين؟؟ .. جوا …… اظنك عارف التشجيع. 

 انت يا البتقدر تفجر وتقدر تحرق وما عاوز خايف على مستقبل البلد دي؟؟ انت يا زول عبيط؟؟ – ااا نسيت انك سكران – معليش يا لط.  

انتوا شنو وانتوا منو واقعدوا مع روحكم

انا ما عارف هم ح يردوا ليك يقولوا ليك شنو. غالباً ولا ح يشتغلوا بيك. بس جدعنة مني ساي كده ممكن انا ارد. ديل النيميتي. وانت التُكل الوقع في ستو. سجم البديك بتو.
انت بتعرف لغة اللستك والكبريت، ودي اللغة الوحيدة البتعرفا. على حسب كلامك. عشان كده انت ما عندك أي دور في مرحلة البناء. لو انت سكران وناسي. مرحلة اللستك والكبريت خلاص، انتهت، بدت مرحلة ح نبنيهوا البنحلم بيهوا. انت حاول امشي اتعلم اللغة دي إذا حابي انك تساهم. خلينا من عقدك دي بالله ياخي! 

تحرق منو باللساتك؟؟ ده تهديد بالقتل على فكرة. وفي دولة المؤسسات المحمية الدستور، كلامك القلتو ده جريمة على فكرة. يبدو انك انت زاتك في نفسك ما جاهز لانك تكون انسان فعال في الدولة البتحلم بيها وقادينا بيها كل مرة عامل لينا فيها انك رب القانون والدستور وانت زول عنقالي ساي بتاع سيخ وتهديد بالقتل والحرق – دي ممكن تقع تحت مظلة الإرهاب على فكرة – فتح عينك يا غبي وبطل سكر ولايفات. الاتنين سوى كده ح تودي روحك في داهيه. 

 

الدقيقة ٤٦

تموتوا إنتوا بعد ده

يا زول ابرد قلنا ليك احسن انت تبرد، تصريحاتك دي بأكلوك ليها بالقانون. عشان كده أسلوب الفارات ده اكسر حنكو. الناس ديل ح يفتروا عليك ويقلوا ادبهم وانت كان راجل نفذ تهديدك. بس ما تندسى زي زمان. لغتك الما بقدروا ليها دي شنو؟؟ تجي لمنو في بيتو يا زول؟ انت الزواميك المعاك في الشقة ديل اقنعوك انو مافي راجل غيرك في السودان؟؟ تجيب حركات مسلحة في الخرطوم؟ تجيب الموت من دارفور ومن كسلا للخرطوم ولي بيوت الناس ديل؟؟  ده اسلوبك يعني ورؤيتك لي مستقبل البلد؟؟؟ سويها عليك الله يا رب السياسة. 

خلينا من أمور مع سيدكم البتلعبوا معاهو القولف والكلام الباطل ده. قول فلان الفلتكاني في محل القولف الفلاني. مافي زول ح يسمعك باحترام وبدون تخوين وبدون قلة أدب. لانو اسلوبك ده ما بنفع معاهو غير كده… فهمتا ولا اعيد ليك؟ 

 يا أيها الزول العبيط، كلامك ده كافي انو يدينك بأنك زول ما عندك رؤية. ولا عندك برنامج، وماخد الموضوع ده “رجالة” بفهمك الغبي ده. نفس فهم القالوا الجكومة دي دايرالا زول ضراعو قوي. ونظام يا فيها يا نفيسها… اها فسيها عليك الله.. وبرضو انت خلاص، مدة صلاحيتك إنتهت وبديت تتحول لزول مزعج وممل. وانا اديتك اكتر من ما يجب يعني من زمن ومجهود.

الدقيقة ٤٩

وصيتنا يدفنو معاك فلان وفلان وفلان؟؟ لي انت فرعون؟؟ ولا ده تهديد تااااني كمان بالقتل؟ كدي قولهم لينا فلان وفلان وفلان. مالو كلامك كلو مبهم كده زي كلام الزول الكضاب؟ خلاص رجالتك البقت كلام في الامارات دي .

اعلموا حسابكم وإنك راجع السودان 

 هع هع ما لاقي ليك راجل ود مرة يجي يناقشك في كلامك لانو مافي زول بقى شغال بيك اصلاً هع هع إلا ياهو زول فاضي زي كده داير يفكها فيك يا بمبي

. مواكب ذوالنون؟؟ زي الطردوك منها دي قصدك؟؟

بالنسبة لموضوع الناس بموتوا والدم واحد والحغرنة بتاعتك دي، وبرضو بما إنك كوز. ح أرد ليك بكلام ربنا برضك

الموت ده من الله يا زول ومافي زول بموت قبل يومو 

وَمَا كَانَ لِنَفْسٍ أَنْ تَمُوتَ إِلَّا بِإِذْنِ اللَّهِ كِتَابًا مُؤَجَّلًا وَمَنْ يُرِدْ ثَوَابَ الدُّنْيَا نُؤْتِهِ مِنْهَا وَمَنْ يُرِدْ ثَوَابَ الْآخِرَةِ نُؤْتِهِ مِنْهَا وَسَنَجْزِي الشَّاكِرِينَ  

ومافي زول بندسى منو ولافي زول بتحامى ورا حته منو 

أَيْنَمَا تَكُونُوا يُدْرِكْكُمُ الْمَوْتُ وَلَوْ كُنْتُمْ فِي بُرُوجٍ مُشَيَّدَةٍ وَإِنْ تُصِبْهُمْ حَسَنَةٌ يَقُولُوا هَذِهِ مِنْ عِنْدِ اللَّهِ وَإِنْ تُصِبْهُمْ سَيِّئَةٌ يَقُولُوا هَذِهِ مِنْ عِنْدِكَ قُلْ كُلٌّ مِنْ عِنْدِ اللَّهِ فَمَالِ هَؤُلَاءِ الْقَوْمِ لَا يَكَادُونَ يَفْقَهُونَ حَدِيثًا 

اما بالنسبة لموضوع حق الشهداء ده، انت بس اصبر شوية، اهو احمد الخير الله يرحمة بدت محاكمة الكتلوهو. انت قايل ده مسلسل مصري كل شي يحصل في الحلقة الاخيرة؟؟ ما تخليك زول بتحنك في الفارغة ياخ! نصحتك كتير والله كفاك. 

قلت لي من زمن جدودنا كانوا بحكموا العالم؟؟ … يا زول انت مش قلت جدك ابو لهب؟ انا بديت اشك انو أبو جهل ما أبو لهب… والله جد! 

قلت لي علاقة سرقة الثورة بسرقة المصرين للفراعنة النوبيين.. اها قمنا عشان نقرى تاريخ خور ابوعنجة… المخابرات المصرية تدفع ليهو ويخاف ويقبض التمن. يا مان والله هنا ده يعني إنت أثبت لي انك سيدها. لكن هي شنو؟ 

 

الدقيقة ٥٤

هدية الموكب 

 ظرطون هوي…! انت كان كاسات الشجاعة الشربوك ليها الزواميك دي خلتك تحس إنك أسد.. انا بنصحك تاني ما تباريهم. دي شكلها شُلة بايظة. انت امشي اتقعد لي معاهم ويشربوك النضيف يفصمك وتجيب لي روحك إتهامات…؟
 

اسي لو لا قدر الله حصل اي شي في المليونية دي تأكد تماماً انو اصابع الإتهام ح تتوجه ليك، اووووعك تقعد تجقلب بعدين. براك شفتها جقلبة عبد الحي.  

خلوك بعد قلتها وقالوا ليك كفاية. فتح عينك… قلت لي بناتنا بقولو جر شخيت واقيف بعيد … اها يا بتاع بناتكم…ديل الابيت تورينا ليهم مش؟؟ اها وتاني شنو قلت لي

الما معانا يجي معانا
انتو ناس حبة كتار
ناس كتار حب شديد
نحلم وبنوم نحلم نصحي..
وننوم واحلام ونصحى ….

داير احكي ليكم قصة حصلت لي حكاها لي واحد صحبي  

انت الطرح فعلاً… إنت الطرح والنتيجة صففففرررر.

ذوالنون يا دولي يا شغال في العالم كلو.. اوع شغلك يكون ركوع برضك زي ما اتهمت غيرك.

نحنا ما بنكرهكم… نحنا خايفين عليكم
نحنا ناس متماسكين صبة… نحنا ناس متجانسين كُتلة
كفر وتر دين اي حاجه ما بتفرتكنا…

عليك الله انت مقتنع بالكلام ده؟؟ خليك من انك تحاول تقنعنا.. انت زاتك مقتنع بي كده؟ وحاة اسم الله اخير كيزان زمان. انت زاتك شكلها فكت منك.

 حقك ح يضيع… 
دمك ح يروح…
 اخوك الدفنتو واخوك اللسه ما دفنتو…

  ده نفس حنك التهديد بتاع الكيزان الزمان والبديل منو هع .. البديل حمدوك ومن خلفة الأصم ورفاقة، زركتني… ما تنسى تحت في صورة هدية ليك. اتفرج عليها بالله.

بالنسبة لي

شايلك في ضهري وانت بتطعني…

اول حاجة الله يكرمك ويكرم السامعين. انا قلت ليك تعال شيلني؟؟ انت براك البتقدم في دعوات.. عشان تجي تقول تطعني في ضهري وانا بحاول اشيلك…. 

نستحمل وتستحملوا والضماير صاحية وناس كتار ماعشان لكن عشان وكلما تأخرصحيان الضمير.. صحوا ضميركم الآن قبل اكتوبر.

جنس خرمجة!!

 

ساعة ودقيقة

نايمين صاحين .. ما واعين صاحين..  

الله يسألك.. ده ما كلام زول سكران؟؟ بتفقدوا حاجات كتيره إلا وعيكم… زي شنو الفقدتوه بالله. لانو الموضوع ده ممكن يجر والناس ما بترحم  

مجنون الطرح واعي.. ونايمنا صاحي.. وسكرانا واعي 
في فرق تماماً ما بين انك تكون ما واعي وتكون واعي…
نحنا واعين في كل الظروف.. وخايفين عليكم من الوعي  

اسي عليك الله ده شنو؟؟

معنى الايه حملنا الامانة؟؟؟ ما مشكلة عادي.. تاني إستعيذ بالله قبل ما تقتبس من القران الكريم.

عملت ليك فاصل كامل تاني بتاع عواطف… كرستاله موية واحناكك البيش دي.. انت من قبيل تقول لينا دايركم توعوا وتاني تجي تقول لينا خايف عليكم من الوعي!  وده ما حاجه ساهله وتاني تشبكنا في ناس كتار في السودان واعين لكن خايفين على البنات السمحات البياخدو معاهم سيلفي. عليك الله انت نصيح؟؟؟ 

 انت عاوز تتنبز؟؟ جداً 

قوووم يا كووووووووووووووز!!!!!!  

المهم.. اها يا الردمو خلو….

يا تقيفوا معاو… يا تنداسوا قريب…

 احي فيك إحساسك الديموقراطي.. وأسلوبك في طرح برنامجك وفكرتك وتصورك لمستقبل السودان. الدولة ذات المؤسسات وسيادة القانون والدستور. بالطريقة دي انت وبناتك ح تبنوا الدولة دي مش؟؟ بي كلامك ده. وناس حمدوك وتجمع المهنيين والباقين ديل كلهم ما فاهمين وانت الشفت الفاهم

 يلا عاين. دي صورة زول سكران قدامو زاموك قاعد معاهم في الشقة. ما صورة مناضل بتكلم قضية وطن وشهداء ومستقبل.

بس عشان ما تجي تحشِّر لينا تاني انو انت الوحيد الشايل هم البلد. عارفين نحنا النضيف بتاع البلد ديك برسم البسمات. 

موية حارة..
 انتي زاتك قومي جيبي موية..

حيرتنا دي موية ولا أمبوبة غاز عشان يجيبوها اتنين؟؟ ولا انت داير تكشف يعني؟؟ هع هع هع امور الجمبات دي يا كوبا ما بعملوها في لايف. ما تفضحنا ياخ!

بتتكلم في اللايف وزواميكك مركزين مع تلفوناتهم ولا شغالين بيك.. والله زي ما قلت ليك.. انت ما مسيطر يا اصلي يعرفوك كيف سكران.. الموية قاعدة جمبك وقومتا الزاموكتين عشان يجيبو ليك موية وحارة كمان.. يعني دي موية نار اصلو؟

 يا سسسسسسسسسسسه!!!!! 

 شايفك فتحت لينا وقعدت تحنك بينا الزواميك يا اصلي.. البنات ديل قاعدات معاك في الشقة يا ذوالنون.. الشغلانة ما محتاجة النقة دي كلها .. الناس ديل جاهزييين ياخ!

حتى البنبزوا ذوالنون هم ذوالنونيين طالما بشقوا الصف وبنتقدوا التجمع..

 ياخ هاك الدوزنة دي! 

 

ساعة و ١٥ دقيقة

لا حاكماً لا سلطاناً لا حزباً لا رأس مالياً لا فقيراً لا وضيعاً لا سيداً لا عابداً لا معبوداً إلا الله

عليك الله راجع جملتك دي واستغفر وتاني بطل سكر قدام الناس… النضيف فصمك. قلت لي اعتى درجات عصيانك…

 خلاص؟ وصلتا مرحة الامانة الخمرية..

حين ينفخض الإيمان منا.. لانستغفر إلا الله..

طيب تاني في منو بستغفروهو؟ والله انت كلامك بقى حشو حشو حشو سااااي.. فتييت عبد الحي شايفك لكن!! هع هع هع وبالعربي الفُصحة كمان قال ليك… ما ردمتو ساي..!  

اسي انا ما فاهم… انت داير تبايع عبد الحي وتعالج الشعب ولا داير تبايع الشعب وتعالج عبد الحي؟ الحته دي شوية ما فهمتها. معليش انا ما عندي موهبتك. المهم يا زول… بين البايع والشاري…. يفتح الله! 

أنت وتلك الخائنة…

دي منو عليك الله ما كنت متابع انا.. مشيت الحمام وجيت… ولا اهااا قصدك البوشي يعني. الليييييلة!!  العاهرة؟ وظلمت العاهرات كمان؟  الكرسي إتباع؟  عواهر؟؟؟ ده جمع تكسير.. قلت لي ركزت على خائنات.. يعني في اكتر من وحده؟؟ وداير محاكم كمان. لالا دي اوفر والله. 

فكوا سيرتو وجيبوا لي انا بالقانون…

هع هع هع هع  يا اخوانا ذوالنون يُعاني من الوحدة… زول بالله يستلم الوردية بعديني ويونسو شوية 

قال كان راجلة تعالي لي قناة زي قناة الشروق….

هع هع هع هع هع   

وانت ما قلت بتفجر برضو… ولا لحقت نسيت؟ يا ذوالنون عيسى حاج علي (نسيت ابو لهب) جدك يا اصلي.. لحقت تنساهو ولا جدك بالجهة التانية؟؟

عبد الحي زول دلوكة وتاجر دين لا يفقة ما يقول…

والله الراجل ده الليله اتنبز في صمة خشمو.. وهو العليهو ما شوية. محاكم وبن لادن وقصص كتيرة خلاص.  عينكم للاسد تطعنو في الضنب..

الزول ده ما فيل يا اخوانا… والله ما فيل… الزول ده جدو ابو لهب ياخ

شايفنك يا البرجوكي… بالراحة ولا شديد….   

هع هع هع هع هع هع هع هع هع 

ح اخلي للقارئ حق التعليق في النقطة دي بالذات..

قالن ليك بالراحة افتكر… قمت زي البت البايرة الفي العرس تصفق 

اسمع يا ونسة بعد البرجوكي..  

منظرك ده ما منظر زول يمثل شخصية عامة.. شوف انت بتقدر تفيد السودان بشنو وسويهو.. ولو عاوز نصيحتي… تمسك خشمك عليك بس وتشوف ليك طبيب نفسي يحلحل ليك عقدك.. أما بالنسبة لي الناس المتابعنك.. ولسة مواصلين معاك ومقتنعين بيك. يبقى ده رأيهم في الآخر.. ودي إمكانياتهم لقراءة الشخصية..  وكل زول بي رايو. 

لكن انت فارة ودخلت روحك في حتات ضيقة. 

يا كوز يا مُفتري … هع هع  

الهدية الما هديتك

زي ما من قبيل بشحتف فيك. قلت ليك عندك صورة هدية ومخصوصة عشانك. رغم أنو الكلام ده بس مني انا براي لكن في احساس إنها معمولة عشانك صراحة. عشان كده جيتنا جاري في لايف ومعاك زواميكك وشابكنا ديل خايفين على البنات البتصوروا معاهم سيلفي. على أي حال. الصورة جمبك. إنجوي 

وقبل ما نختم.. بس حاجه بسيطة كده

انا كنت محتار بين اسمين اسميك بيهم. وبما انو نحنا في عصر السودان بخطوا فيهو اول خطوات الديموقراطية.. ح اخلي الفرصة للأغلبية تختار ليك الاسم. حتى لو كان المصوتين تلاته انفار. ممكن إنت زاتك تشارك على فكرة. 

الاسم الاول: ظرطون

الاسم التاني: ذوالكوز

وزي ما قال ابو زعيمة

بس انت حاول بيت ، فرشة ومعجون نديك ،الشاي صباح نسقيك ، ذلابية نجاسفة ليك

تلفونك نشحنو ليك ، وايفاي نربطو ليك كنداكة نعرسها ليك ،لو أبت نحنكها ليك 

ويا عمك، زمن انت كنت معيشنا في درامات الموفدين الحكوميين الجاينك في ماليزيا عشان يغتالوك يا مانديلا، الشفت ده والمعاهو كانوا حايمين في شوارع بُري ويهزجوا

التاتشر كبس كبساً كبسا ، والترس قفل قفلاً قفلا، الدوشكا ضرب ببم ببم ، واللستك ولع وليليج وليليج، وثوار وصل وصلاً وصلا

فعشان كده انت لو كايس الشُهره ماف ليك.. وإذا كايس المنصب ما عندك مؤهلات.. وإذا كايس خير البلد ابرد وبطل الجوبكة بتاعتك دي وامسك ليك حته صلحا في البلد من غير طاقاتك السلبية البتجي تفكها فينا في اللايفات دي.

نبز وشتيمه وتخوين وتهديد ويا دنيا ما فيكي إلا أنا، 
أعوذ بالله من كلمة أنا ياخي!!
كيسك فاضي والبينا كان آيسكريم وساح يا عمك

لقب ذوالنون Live

  • ظرطون
    66% 2 / 3
  • ذوالكوز
    33% 1 / 3

تواصل معنا

قم بمراسلتنا عبر الإستمارة

9 + 4 =