كتبت / داليا كباشي 

30 سنه من حكم الكيزان وطيف واسع – للأسف – من الشعب ما كان بيستنكر شظف الحياة وبؤسها الا بقلبه او ببعض الهمهمه (الحذرة) في المواصلات مسافه يصل بيتهم!

30 سنه ما حصل عارضتا..
ولا حصل فتحت خشمك ولا من الله عليك ب بوست واحد تقول فيهو بس انو كيلو الطماطم حصل رقم فلكي او انو ملوه البصل اتجاوزت امكانيات مرتبك الضئيل!

30 سنه ما حصل شفناك منتمي لي كيان منظم بيدعو للخروج على النظام..
بتمشي حضرتك تحضر محاضراتك في الجامعه وتخلط وتشرب جبنه خالي سكر وتقطع وتتونس وتضحك على الكوادر السياسيه الطلابيه وتتطعمج فيهم وتقول ليهم شوفو قرايتكم.. وانتو ما عندكم موضوع.. وانتو عاملين فيها عايزين تغيرو الحكومه.. وتشمت في الطلبه الطالعين من المعتقلات وفاتتهم الإمتحانات وسقطوهم او فصلوهم!

30 سنه وانت بتغتغت لي رئيسك الكوز في الشغل..
وتمرر ليهو الأخطاء والفساد والمحسوبيه..
ووقفتا تتفرج لمن جاب ود اختو الما فارز الألف من كوز الذرة وختاهو في محلك انت المؤهل بشهاداتك..
وبتقعد تعمل شغلك وشغلو وشغل تسعين نفر ما موجودين اصلا ومسجلين في كشف المرتبات وما بتفتح خشمك لانك شايف انو ديل كيزان ودي اقدار الله والحمد لله على الملاليم الباخدها!

كافوري شارع القنطرة

30 سنه جارتكم الكوزة بتعلي في بيتها..
وتبني طابق فوق طابق..
وعيالها الامنجيه بيبلغوا في اولاد الحله..
بتجي ازمه سكر وجارتكم عندها سكر..
بتجي ازمه دقيق وجارتكم صواني البيتزا والمكرونه تتطاقش عندهم..
والعربات بتتغير كل فتره..
وانتو ساكتين ومستكينين ومافي زول فيهم الله فتح عليهو وحتى قاطعهم اجتماعيا!

30 سنه مويه المطرة بتتحجز في الميدان القدامكم..
والباعوض يقطع الشفع..
والذباب يحميكم الاكل والشراب..
والاسهالات المائيه تفتك بالكبار والصغار..
وخدمات الصحه حدث ولا حرج..
بترفعو بناطلينكم وتمشو بي فوق الطوب عشان المويه ما توسخ الجزم.. وتصلو الزلط.. وتحرسو المواصلات وتمشو اشغالكم عادي!

30 سنه امك بتفتش ليها الدوا في قروب وصف لي..
وبتفتش لي بت جيرانكم العيانه سرير في عنايه في قروب وصف لي..
وتطلب لي زوجتك الحا تولد قزايز الدم من قروب نقطه دم..
وتفتش لي جارتكم المسكينه زول يتبرع ليها بي بطاطين من ناس صدقات..
وتشحد من هنا وتلتق من هنا وتجازف بي هنا عشان الدوله ما شايفه شغلها اصلا وبالطبع ما بتجيب سيرة الحكومه اساسا!

30 سنه بتجازف مع اصحابك في صحن الفته..
وتجازفو في المواصلات..
وتجازفو في السجارة..
وتجازفو في عرس صاحبكم..
وتجازفو في اي حاجه ممكن تتجازف في الدنيا بدون ما تفكر اصلا تسأل الحكومه ليه انا بجازف وانتو قاعدين؟

30 سنه انبحت اصوات كل الكيانات السياسيه احزاب.. حركات.. مبادرات.. نضال مسلح.. انهم يحنسوكم تطلعو تقولو تسقط الحكومه دي!
انت قاعد خاتي رجل على رجل..
وبتشتم الاحزاب وتشتم الحركات المسلحه ومنتظرهم يجيبو ليك حقك ويسترجعوا ليك وطنك وانت مدور الكشاتين في شارع النيل وتمتحن وتنجح بينما اولادهم بيترفدوا من الجامعات وبيتعذبوا في المعتقلات!

يقولو ليك عايزين نعمل عصيان
ااااه عصيان شنو البشيل الحكومه!
عايزين نعمل وقفه احتجاجيه
اااااه وقفه شنو في الحر دا!
عايزين نعتصم
اااه اعتصام شنو يخوانا!
والثورة دي زاتها لمن طلعتها (لو طلعتا) طلعتا على مضض وجيت تنقنق انو مافي فايدة والناس بتموت ومافي داعي وبلا بلا بلا يا قرضه مصاصه العرديب انت!!

جاي هسا داير حكومه انتقاليه استلمت فساد 30 سنه انت زاتك كنتا مشارك فيهو بي سكوتك وعايزها تقلب ليك السودان في 6 شهور؟
عايز الحكومه الانتقاليه تجيب ليك العيش والبنزين والدوا وتسفلت الشوارع وتقسم رز بي لبن في الاستوبات الليله طوالي ؟
وبتشتم في حكومه ثورة جات بالعرق والدموع..
وقاعد ماسك تلفونك وتحبط في الناس..
وانت 30 سنه ساكت وماسك خشمك وبالع الفي رجلك وصابر على الكيزان المجرمين القتله.. وما عايز تصبر على حكومه ثورة؟!

تتفضل تقوم على حيلك تشتغل وتدعم الحكومه دي..
ولو ما عايز تشتغل احسن.. وفكه.. وما عايزين منك شي..
بس لم خشمك الكنتا لاميهو زمن الكيزان داك عليك..
وخلي الناس الباقيه تشتغل وفي قلوبها امل..

زمن الكيزان كنتا ساكت وخايف !
هسا طبعا لقيت اجواء الحريات والديموقراطيه الجابوها الناس الكنتا بتضحك فيهم زمان بي عرقهم..
وبتستغل فيها بدون حيا ولا اختشا زاتو وتفلع فيهم!

اخجل ياخي كان ما بتخجل نخجل ليك!

حبه من الخوف الكنتا خايفو ايام الكيزان شيلو في كيس وامشي بدلو في سوق سته بي حبه خجل!

تعليقاتكم...

تواصل معنا

قم بمراسلتنا عبر الإستمارة

6 + 3 =

%d مدونون معجبون بهذه: